Maha CM-in lockdown puan lehah vau

Maharashtra chief minister Uddhav Thackeray chuan state mipuiten Covid-19 hri darh tur venna atana sorkarin kaihhruaina a siamte an zawm ṭhat loh chuan lockdown puan lehah a vau. 

Ram chhung hmun tam zawkah hri kai thar zat hian tlakhniam lam a pan tawh a, hetih lai hian Maharashtra-ah chuan tun hnaiah hri kai hi an pung chho leh a ni. CM Thackeray chuan, "Mipuite an inthlahdah ṭan a, hei vang hian kharkhipna hnuaia awm leh an duh nge, sorkar kaihhruaina siamte ṭha takin an zawm dawn tih an thlan a ngai a ni," a ti. Tualchhung thuneitute chu Covid-19 SOP zawm lote dap chhuak tura beihpui thlak turin a ti. 

Mumbai mayor Kishori Pednekar pawhin khawpui chhungah hri kai an pung zel tih sawiin, rel pawh dan pangngaiin tlan tir an ni a, hna dang pawh hawn chhoh zel a nih avangin mipuite chu fimkhur zual a, face mask vuah tur te, sanitizer hmang ṭha tur leh social distancing-te zawm ṭha turin a chah. Mipuiten dan an zawm ṭhat loh chuan Mumbai khawpui lockdown puan leh mai chu an hmabak a ni chho dawn tih a sawi ve bawk. 

State chhungah Covid-19 kai an pun chak leh tak avangin CM leh a deputy Ajit Pawar chuan municipal commissioner leh district administrator-te chu hri leng chungchangah review meeting an neihpui a ni.