SAARC meeting vawiinah nei dawn

India chuan vawiin hian South Asian Association for Regional Cooperation (SAARC) virtual meeting a host dawn a, heta tel tur hian Pakistan pawh a sawm.

SAARC virtual meet hi health secretary-level-a neih tur a ni a, Covid-19 chungchang an sawi dawn a ni. Covid-19 dolet dan chungchang leh a dona kawnga hmalak dan tur inhrilh tawnna chungchang virtual workshop a ni.

Nikum March thla khan SAARC ramte hian video conference hmangin meeting an lo nei tawh a, hemi ṭum hian prime minister Narendra Modi chuan Asia chhim lam ramte tana Coronavirus Emergency Fund siam a lo rawt tawh nghe nghe.

PM Modi rawtna hi bawhzui niin ram hrang hrangin pawisa an thawh khawm a, India pawhin US dollar maktaduai 10 a thawh a ni. SAARC ramah hian Afghanistan, Bangladesh, Bhutan, India, Maldives, Nepal, Pakistan leh Sri Lanka-te an tel a, khawvela mipui awm zawng zawng zinga 21% chu helai huamchhunga cheng hi niin kum 2019 thleng kha chuan khawvel economy 4.21% an thawh ve bawk.