Finance Minister Goyal-an Union Budget pharh

Finance Ministry additional charge la mektu, Minister Piyush Goyal chuan nimina Lok Sabha inkhawmah Budget 2019 a pharh. 

BJP kaihhruai NDA sorkar chuan a hmain nimina budget pharh tur hi interim budget tih a nih tur thu a lo sawi tawh a, budget puitling chu Lok Sabha inthlanpui neih zawha sorkar thar siamtuin a la pharh dawn a ni. 

NDA sorkar chuan kumin Lok Sabha inthlanpui neih tur thlirin nimina budget a pharhah hian loneitute hamṭhatna tur a siam bakah, chhiah ngaihdam theih chin a tisang bawk. 

Finance Minister Piyush Goyal chuan unorganised sector worker-te kum 60-a an pension hnuah thla tin pension, Rs 3,000 pek an nihna tur Pradhan Mantri Shram Yogi Mandhan (PMSYM) scheme a tlangzarh. He sector hnuaia pension pekna tur atan hian hnathawktute chuan thla tin Rs 100 an dah a ngai ang a, sorkarin hemi zat vek hi a dahpui bawk ang. He hamṭhatna hi kum nga chhungin hnathawktu vaibelchhe 10 velin an chhawr thei dawn niin a sawi. 

Minister chuan loneitu, ram hectare hniha zau chin neite ṭanpuina turin Pradhan Mantir Kisan Samnan Nidhi hnuaiah kum tin Rs 6,000 pek an nih tur thu a puang bawk.a ni. Heng pawisate hi direct benefit transfer hmangin an bank account-ah thawh thuma pek an ni ang. He scheme hi kum 2018, December 1 aṭanga hman ṭan tur anga tih a ni.  He ruahmanna hi loneitute vaibelchhe 12 velin an chhawr dawn a, hemi atana sum senso tur hian cheng vaibelchhe 75,000  ruahman a ni. 

Goyal chuan kum 2022-ah loneitute sum lakluh a leta tihpun a nih theihna turin Pradhan Mantri Fund Scheme siam a nih thu a sawi bawk.

Minister Piyush Gopal-an budgeta a tarlan tlangpuite -

•    Mimal chhiah awl thei chin sum lakluh bihthliah chu kum khata cheng nuai nga chin lalutah tihsan a ni.  

•    Kum khatah cheng nuai 6.5 chin lalutte chuan provident fund leh prescribed equity-a investment an tih chuan chhiah an pek a ngai lo. 

•    Rs 40,000 hlawh chinte laka standard tax deduction hman ṭhin chu Rs 50,000 chinah tihsan a ni. 

•    Sumdawng, kum khata cheng vaibelchhe nga hnuai lam lalutte tan thla thum danah chhiah pek phalsak an ni. 

•    Hmarchhak bial tana sum dah chu kumin atan cheng vaibelchhe 58,166-ah tihpun a ni a, nikum aia a sanna hi 21% chuang a ni. 

•    Rashtriya Gokul Mission tana sum dah chu kum kal mek atan cheng vaibelchhe 750-ah tihsan a ni.

•    Food subsidy atan Rs vaibelchhe 1.7 dah a ni. 

•    Mahatma Gandhi National Rural Employment Guarantee Scheme atan cheng vaibelchhe 60,000 dah a ni a, a ṭul a nih chuan dah belh leh a ni ang.