Alok Verma-an sorkar thupek zawm loh vangin hrem tawk maithei

Central Bureau of Investigation (CBI) Director aṭanga sawnchhuah Alok Verma chu sorkarin a dahna, Fire Service chief hna a zawm duh loh avangin department lam aṭangin hrem a tawk maithei nia sawi a ni. 

Alok Verma hi Ningani kha pensiona a chhuah ni tur a ni a, hemi ni hian a hna thar, Fire Services, Civil Defence and Home Guards director general hna hi zawm turin Ministry of Home Affairs (MHA) chuan a hriattir a, mahse a zawm duh lo a ni. 

Official-ten an tarlan danin, Verma thiltih dan hi all India services officers service rules palzutna a ni tih a sawi. Sorkar thupek a zawm duh loh vang hian a pension hamṭhatna dawn turte thlengin a nghawng thei dawn niin MHA official-te chuan an sawi.

Nilaini khan MHA hian Verma hi lehkha thawnin, Fire Services, Civil Defence & Home Guards -a DG post chu zawm nghal turin a hriattir a, mahse hemi ni vek hian Verma chuan chhang letin January 10, 2019 zan aṭang khan CBI, Director aṭangin a pension pangai anga a chhuah tawh thu a sawi thung. Home ministry Deputy Secretary, RS Vaidya hnena chhanna a pekah Verma chuan official record-a a piankum chu July 14, 1957 niin a pension hun chu kum 2017, July 31 kha a ni tawh tih a sawi. Mahse a pension hnuah pawh kum hnih chhung atan CBI Director hi a chelh leh tih a sawi bawk. Hei vang hian January 10, 2019 zana CBI director aṭanga ban a nih hnuah khan kum 60 a pelh tawh bawk avangin Director, CBI post aṭangin a pension ta tih a sawi a ni.