Shaheen Bagh-ah Mipui punkhawm khap
Delhi police-te chuan nimin khan buaina punlun zel tur thunun a nih theih nan, Shaheen Bagh huam chhungah Criminal Procedure Code (CrPC) section 144 an puang a, mi pali aia tam punkhawm phal a ni lo.
Shaheen Bagh-ah hian nikuma Jamia Milia Islamia (JMI) University campus chhunga buaina thlenga police inrawlhna avang leh Citizenship (Amendment) Act, 2019 (CAA) duh loa kawng danga nawrh huaihawtte chu nikum December 15 aṭang khan an pungkhawm tawh a ni.
Pungkhawmten kalkawng an dan avang hian inkalpawhnaah harsatna a thlen tih Joint Commissioner DC Srivastava chuan sawiin, buaina a punlun loh nan helai hmunah hian section 144 chu an puang tih a sawi bawk. Shaheen Bagh-ah hian paramilitary force, company 12 leh jawan 1,000 dah mek a ni.
CrPC section 144 hi mi pali emaw a aia tam punkhawm khapna a ni a, state sorkar chuan thla 6 aia tam section 144 hi a hmang thei lo thung.
Delhi-a buaina chhuak vangin FIR 167 ziak lut
Delhi hmarchhak lam, Jaffrabad, Maujpur, Yamuna Vihar, Chand Bagh, Mustafabad leh Bhajanpura biala CAA thlawptute leh duh lotute intihbuai vanga buaina nasa tak chhuak kaihhnawihah FIR 167 ziah luh a ni tawh. Boruak hian ziaawm lam a pan tawh a, venhimna khauh tak erawh kalpui chhunzawm a la ni.
Boruakin ziaawm lam pan tawh mah se, khawpui chhung hmarchhak bialah hian venthawn thilah school-te chu March 7 thleng khar an la ni ang.
London-ah CAA duh lohna lantir
Delhi khawpui chhunga buaina thlengah leh, CAA duh lohna lantirin Inrinni khan London-ah nawrh huaihawt a ni. Nawrh hauihawttute hi South Asia Solidarity Group, SOAS India Society, South Asian Students Against Fascism, Federation of Red bridge Muslim Organizations (FORMO), leh Coordinating Committee of Malayali Muslim niin, London-a Indian High Commission kawtah mi tam tak an pungkhawm a, prime minister Narendra Modi kaihhruai sorkar chu an dem thu an aupui.
London-a nawrh huaihawtte hian union home minister Amit Shah chu bang turin an phut. Delhi buaina tipunlun zawnga inhuatna chawk tho thei zawnga thu sawitu, BJP hruaitu - Kapil Mishra, Anurag Thakur leh Paversh Singh Varma te chu man an phut bawk.