Citizenship bill thlawp tura PM ngenna Mamata-in hnawl

Prime Minister Narendra Modi-an India rama raltlanten khua leh tui nihna an neih theihna tur, Citizenship Amendment Bill thlawp tura a ngenna chu West Bengal Chief Minister Mamata Banerjee-i chuan a hnawl a, he bill hi hnukdawk zawk turin a ti. 

Kar kalta Inrinni-a West Bengal-a Thakurnagar-a rally neihnaa thu a sawiah, PM chuan India chu Hindu, Sikh leh raltlan dang tam tak, ṭhenawm ram aṭanga rawn tlanchhiate himna pe theitu a ni, heng raltlan rawn lutte hian khua leh tui nihna nei turin dikna an neih ve a ngai a ni, tiin, Bengal-a rorellai Trinamool Congress chu Parliament-ah Citizenship Amendment Bill thlawp turin a sawm. 

Citizenship Amendment Bill  hi Lok Sabha-ah pass a ni tawh a, Rajya Sabha-ah ngaihtuah a la ni lo thung. 

Banerjee-i chuan PM ngenna hi an hnawl thu TV-a thu a sawinaah a sawichhuak nghal a, an party chuan sakhaw leh hnam behchhana BJP-in India ram mipute ṭhendarh a tum chu an remti dawn lo tih a sawi. He bill hi an dodal tlat tih sawiin, sorkar laipui chu hukdawk turin a ti nghal bawk. Citizenship bill avang hian hmarchhak bial pum chu an buai a, BJP-in hmarchhak bial a tihchhiat chu an phal ngai dawn lo tih a sawi.