BJP-in Ram temple duh, party dangten an dinhmun tichiang rawh se : Amit Shah

BJP president Amit Shah chuan Ram temple chung-changah BJP chuan a duhdan chiang takin a sawi a, party dangte pawhin an dinna an tihchian ve a ngai a ni, a ti. 

Ayodhya-a Hindu leh Muslim-ten ram an inchuh chungchangah Amit Shah chuan, "Kan duhdanah kan chiang a, Ram temple hi a hmaa a dinna ngaiah ngei sak leh kan duh a ni", a ti. He thu hi nimina New Delhi-a party national programme ‘Bharat ke mann ki baat, Narendra Modi ke saath’ hmannaah a sawi a ni. 

Shah chuan kum 2014 hma chuan party hrang hrangte chuan a thutiam tihhlawhtlin tumin eng thil mah anti lo a, hei vang hian ram sum dinhmun pawhin a tlakhniam phah a ni, a ti.  Mahse kum nga kalta chhung khan Narendra Modi-a sorkar chuan ram dinhmun a thlak danglam a, PM hmathlir ṭha tak tak neihte chuan ram hmasawnna tluantling neihna tur lungphum a phum a, tunah chuan khawvelin India chu zah takin an thlir tawh a ni, a ti. 

BJP campaign kalpui dan thar tur pawh sawiin, thla khat chhungin BJP worker vaibelchhe 12 vel chuan ramchhunga chhungkaw vaibelchhe 10 chuangte chu tlawhin, India ramin dinhmun thar a tawn mek chungchanga an ngaihdan te, Narendra Modi-a lakah an beisei te an zawt kual vek dawn a ni, tiin a sawi.