Bihar-a rel chesualah mi 7 thi

Bihar khawpui, Patna aṭanga km 30 vela hla Vaishali district-ah nimin khan Delhi pan, Seemanchal Express a chesual a, mi pasarih an thi a, midang 30 in hliam an tuar. 

Railway official-te chuan rel chetsual hun hi zinglam dar 3:58a ni tih sawiin, rel pindan 11 a let tih an sawi. Pindan pathum chu a chhe hneh hle. He rel hi Bihar-a Jogbani aṭanga Delhi pana tlan a ni a, a chetsual lai hian full speed-in a tlan niin an sawi. 

Rel chesuala thite ruang hi lakchhuah an ni tawh a, hliam tuarte pawh damdawi-in lam panpui nghal an ni bawk. Railways chuan thi chhungte chu cheng nuai nga ṭheuh pek an nih tur thu leh, hliam tuar na zualte chu Rs nuai khat leh, hliam na vak lote chu Rs 50,000 ṭheuh pek an ni dawn tih an sawi. Damdawi-ina an inenkawlna senso pawh Railways-in a tumsak vek ang. Bihar sorkar pawhin thi chhungte chu cheng nuai li ṭheuh, hliam tuarte chu Rs 50,000 ṭheuh a pe dawn tih a sawi.