CBI Director thar atan Rishi Kumar Shukla ruat

Prime Minister Narendra Modi-a kaihhruai selection committee chuan Central Bureau of Investigation (CBI) Director thar atan Rishi Kumar Shukla a ruat. 

Rishi Kumar Shukla hi Madhya Pradesh DGP hlui niin, 1983 cadre of IPS niin, CBI Director atan hian kum hnih chhung atan ruat a ni. 

CBI Director hna hi kumin January 10-a Alok Verma sawnchhuah a nih aṭang khan hnawhkhah lohin a la awm a ni. Verma leh a deputy Rakesh Asthana-te chu eiru leh thamna dawngah inpuh tawnin an inkar boruak a chhe hle a, hei vang hian sorkar chuan an hna aṭang hian chawlh tirin, M Nageswara Rao chu interim CBI chief atan dah a ni. 

PM kaihhruai selection committee hian a hmain CBI Director thar ruat tur hian meeting an lo nei tawh a, mahse ruat thei loin meeting an lo titawp tawh a ni. Kar kalta Zirtawpni khan meeting hi an nei leh a, darkar khat chuang zet an sawiho a ni. Selection committee-ah hian PM Modi bakah Chief Justice of India Ranjan Gogoi leh Lok Sabha-a eptu pawl hruaitu Mallikarjun Kharge-te an tel. 

CBI hotu thar ruat a nih hmaa he dinhmun chelh tura sawilan zingah hian Shukla bakah senior IPS officer, 1984 batch Javeed Ahemd, Rajni Kant Misra leh SS Deswal te pawh an tel. 

Congress hruaitu leh selection committee member, Mallikarjun Kharge chuan nimin khan Prime Minister Modi-a lehkha thawnin, CBI Director thar atana Shukla ruat a nih chungchangah a lungawi loh thu a sawi. Kharge chuan CBI hotu thar tur hian anti-corruption case buaipuina turah tawnhriat a la nei ṭha lo hle a, he post chelh tura ruat a nih danah inkaihhruaina dan awmte palzut a ni, a ti. A telna selection committee chuan Delhi Special Police Establishment Act (DSPE) a bawhchhia niin a sawi a ni. CBI Director thar ruatna tura hian anti-corruption case lama tawnhriat nei ni lo, investigation experience nei dah a nih theihna turin dan awmsa chu palzut niin a sawi a ni.