Mamata-in Kolkata-ah nawrh huaihawt Eptu pawl hrang hrangten an thlawp

West Bengal Chief Minister Mamata Banerjee-i chuan Pathianni zana an state police leh Central Bureau of Investigation (CBI) official-te inkar intihthiam lohna awm chungchangah CBI-te chetdan a dem thu sawiin, nimin khan Kolkata-ah sit-in protest a huaihawt. 

Pathianni khan CBI officer-te chuan Kolkata police hotu Rajeev Kumar chu Ponzi scheme kaihhnawiha thu zawhfiah an tum a, mahse Kumar-a ina kal CBI official-te hi local police-te chuan Kumar-a thu an zawh theihna tur lehkha pawimawhte an nei em tiin an lo dang a,  police station-ah hruaiin hren zui an ni a, mahse reilote hnuah chhuah leh nghal an ni. Chhuah an nih hnu hian Kolkata-a CBI office-ah central force-te dah nghal niin, Kolkata police-te chu kalchhuah tir nghal an ni. 

CBI joint director Pankaj Srivastava chuan agency official-te chu chit fund scam chungchanga Kumar thu zawt tura kal an ni tih leh, secret operation a nih thu a sawi. Mahse Joint Commissioner of Police (Crime) Pravin Tripathi chuan CBI officer-te hi eng ang operation nei tura kal nge an ni tih pawh an hre lo niin a sawi. Kolkata Police-te chuan Kumar hi a hnathawhna hmunah pawh kal loin a bibo nia sawi pawh thu dik lo a nih thu sawiin, January 31-a chawlh a lak tih loh chu office hi a kal ziah niin an tarlang. 

West Bengal CM Banerjee-i chuan CBI officer-te hian search warrant pawh nei loin Kumar-a inah hian kalin thu zawhfiah an tum tih a sawi a, hei hi ram danpui kalh a ni, a ti. BJP chuan an party in sorkar an siam theih lohna state apiangah boruak ṭha lo siam a, President' rule puantir an tum vek a ni tiin CBI chu BJP duhdan anga cheah a puh. 

Banerjee-in an state-a CBI official-te chetdan dodal a, BJP laka lungawi lohna a lantir hi eptu pawl hrang hrangten an thlawp thu an sawi. Banerjee-i party, Trinamool Congress hruaitu Derek O'Brien chuan BJP chu ram danpui paihthlak tumah a puh. BJP hruaitu hlui Yaswant Sinha pawhin Kolkata-a thil thlengah sorkar laipui chu a mawhphurtuah a puh a, Congress hruaitu Abhishek Manu Singhva pawhin CBI chetdan chu a dem thu a sawi. 

Congress president Rahul Gandhi chuan Bengal-a thil thleng chu PM Modi leh BJP-ten India institution-te an dim lohzia leh, an chhiatna tur pawh an ngaih pawimawh lo zia lantirtu a ni tiin, eptu pawl hrang hrangte chuan thawkhoin hetiang thunei taka an inlulinna hi an titawp sak dawn a ni, a ti. 

Samajwadi Party hotu Akhilesh Yadav pawhin BJP sorkarin politics thila CBI dik lo taka a hmang ṭhin chuan ram mipuite leh ram danpui chu dinhmun hlauhawm taka a dah tih a sawi a, BJP hi hneh ngei an nih theihna turin eptu pawlte leh ram mipuite chu an ṭangrual tlat dawn a ni, a ti. 

Delhi Chief Minister leh AAP hotu Arvind Kejriwal pawhin Mamata Banerjee-i hi phone-a biain a thlawp thu a hrilh a, a thlawpna lantir hian Kolkalta-ah pawh a kal maithei nia sawi a ni. PM Modi-a chuan India ram democrary leh sorkar laipui inrelbawl dan chu mi nuihzatah a siam tawh a ni, a ti. 

TDP president leh Andhra Pradesh Chief Minister N Chandrababu Naidu pawhin Kolkata-a CBI official-te chet dan chu a dem thu a sawi a, Banerjee-in ram danpui leh sorkar inrelbawlna humhim tura hma a lakna chu an thlawp thu a sawi bawk. 

J&K-a National Conference leader Omar Abdullah leh Tamil Nadu-a DMK hruaitu MK Stalin te pawhin Banerjee-i an thlawp thu hi an twitter-ah an ziaklang.