Sorkarin a thutiam a hlen loh chuan Padma Bhushan ka pe kir ang : Hazare

Social activist Anna Hazare chuan Prime Minister Narendra Modi-a kaihhruai sorkarin Lokpal ruat a lo intiam tawh chu a tihlawhtling lo a nih chuan chawimawina a dawn, Padma Bhushan chu a pe kir dawn tih a sawi. 

Anna Hazare hian eirukna dotu tur, central-a Lokpal leh state-a Lokayukta ruat fel phutin kar kalta Nilaini aṭang khan an khua, Maharashtra-a Ralegan Siddhi-ah tiam chin awmloa chaw nghei a huaihawt mek a ni. Hazare hian Lokpal leh Lokayukta ruat a phut bakah, loneitute harsatna tawh mekte chinfel sak dan ngaihtuah turin sorkar a phut bawk. 

Hazare chuan BJP kaihhruai NDA chu a thutiamte hlen turin a phut tih a sawi a, Modi-a sorkar chuan mipui rinnate a tihchhiatsak tawh a ni, a ti. Hazare chuan a chawimawina dawn, Padma Bhushan chu President hnenah a pe kir leh mai dawn a ni tih sawiin, "He chawimawina dawn duh vang hian ka thawk lo a, khawtlang leh ram tana ka thawhna avangin min hlan a ni. Mahse kan ram leh khawtlang dinhmun hi hetiang reng a nih chuan, engvangin nge he chawimawina hi ka kawl reng thei ang?" tiin a sawi. 

Kum 81 mi, Hazare hi kum 1992 khan ramchhung civil mi chawimawina sang pathumna, Padma Bhushan hi hlan a ni. 

Hazare hian kar kalta Nilaini-a chaw a nghei aṭangin kg 3.8 a hloh tawh a, blood pressure, blood sugar leh creatinine level pawh a sang tawh niin doctor chuan a sawi. Nimin khan Ahmednagar-a collector office kawtah Hazare thlawpna lantirin loneitute 5,000 velin nawrh an huaihawt ve bawk.