Loneitute'n darkar li chhung rel kawng dang

Farm law thar pathum duh lohna lantira nawrh huaihawt mek, loneitute chuan nimin khan an lungawi lohna lantirna kal zelah 'rail roko' huaihawtin,  darkar li chhung rel kawng an dang. 

Loneitute hian farm law siam tharte sut tura sorkar nawrna atan chhun dar 12 aṭanga tlai dar 4 thleng rel kawng hi an dang a ni. Nawrh huaihawt dawn vang hian Railways chuan ram chhunga rel kawng hrang hrangah Railway Protection Special Force (RPSF) sipai company 20 chuang a lo dah lawk. Railway Protection Force director Arun Kumar chuan Punjab, Haryana, Uttar Pradesh leh West Bengal-ahte venhimna uluk zual a ni tih sawiin, loneitute pawh buaina chawk chhuak zawnga awm lo turin a ngen. 

Rail roko neih a nih tur thu hi kar liam ta khan farm law duh lohna lantirnaa hma la tur ber, Samyukta Kisan Morch (SKM) chuan a lo puang tawh a ni. Hei hi farm law duh lohna lantirnaa hmalakna lian tham an buatsaih ṭum thumna a ni a, January 26 khan Delhi khawpui chhungah Republic Day tractor rally neiin, February 6 khan 'chakka jam' an lo huaihawt tawh bawk. 

Kisan Andolan Committee thupuangtu, Jagtar Singh Bajwa chuan rail roko hi boruak ṭha tak hnuaia neih a ni tih sawiin,  loneitute chuan rel passenger-te harsatna thlen lo tur ang bera hma an lak thu leh, ei leh in turte pawh an theih angin passenger-te an pek thu a sawi. 

Loneitu pawl, Bharatiya Kisan Union (BKU) chuan farm law duh lohna lantira nawrh huaihawt mek assembly inthlan neih hnaivaina, West Bengal-ah pawh neih a ni dawn tih a sawi. 

Loneitute hi Delhi border-a dan siam thar duh lohna lantir hian hun rei tak an inkhuar tawh a ni. BKU thupuangtu Rakesh Tikait chuan West Bengal-a loneitute pawhin an thlai tharte chu minimum support price (MSP) in an hralh thei lo tih sawiin, nawrh huaihawtna hmun hi zauh an tum tih a sawi. Hemi rual hian inthlan neih tur chungchang nen nawrh huaihawt hmun zauh an tum hi inzawmna a nei lo tih a sawi thung. West Bengal-a loneitute hmu tura kal thuai an tum thu a sawi bawk.