PM-in petrol man san chhanah sorkar hmasa puh

Ram chhungah fuel man a sang chho zel a, Nilaini khan eng emaw zatah petrol litre  khat man Rs 100 a kai hial. Hetih lai hian prime minister Narendra Modi chuan petrol man san chhanah sorkar hmasa a puh. 

Narendra Modi chuan Congress party kaihhruai sorkar hmasa khan ram pawn aṭanga energy lakluh a titlem lo a, hemi nghawng zelah hian ram chhungah petrol man hi a san chhoh phah ta niin a sawi. Kum 2019-20 financial year chhung khan India chuan rampawn aṭangin oil  a mamawh zat  85% chu a lakluh thu Modi chuan a sawi a, heng zinga 53% chu gas atana mamawh a nih thu a sawi bawk. Oil lakluh chungchangah hian rampawn lamah India chu a innghat lian hle a ni, a ti.

PM chuan tumah sawisel hranpa an ngaih loh thu sawiin, oil chungchangah hian India chuan nasa taka hmalakna neih a ṭul thu a sawi. Petrol man a san avang hian middle class ten a tawrh thu Modi chuan a sawi a, sorkar hmasa khan rampawn aṭanga oil lakluh kha lo ti tlem se chuan vawiina middle class-te harsatna tawh hi a ziaawm ang, a ti. Ni kua chhung zet petrol man hi a sang chho a ni. 

Eptu lam chuan oil man san chhanah hian Modi kaihhruai sorkar chu an puh thung a, Modi kaihhruai sorkar chuan tax an lak hnem avangin a man hi a pun phah niin an sawi. Global rate a tlakhniam hnuah pawh sorkar laipui chuan a chhiah lakte hi a tihniam leh tawh lo a, chhiah sang takin a lak chhunzawm zel tho a ni, an ti. Petrol selling price aṭanga central leh state tax share hi 60% niin, diesel-ah 54% a tling.