Centre vs Mamata Kolkata police hotu man loh tur, mahse CBI hmaah a inlan tur a ni : SC

Central Bureau of Investigation (CBI) official-ten Kolkata Police Commissioner Rajeev Kuman man an tum avangin inhriatthiam lohna awm chungchang chu nimin khan Supreme Court chuan a ngaihtuah. Rajeev Kumar chu thu zawhfiah tur hian Shillong-ah CBI hmaa inlan turin a ti a, hemi rual hian CBI chu Kumar chuan an man thei lo ang, a ti bawk. 

Pathianni khan CBI officer-te chuan Kolkata police hotu Rajeev Kumar chu Ponzi scheme kaihhnawiha thu zawhfiah an tum a, mahse Kumar-a ina kal CBI official-te hi local police-te chuan Kumar-a thu an zawh theihna tur lehkha pawimawhte an nei em tiin an lo dang a,  police station-ah hruaiin hren zui an ni a, mahse reilote hnuah chhuah leh nghal an ni. 

West Bengal Chief Minister Mamata Banerjee-i chuan CBI-te chu BJP in a duh anga a thunun theih nia sawiin, an state police hotu hi manna tur, arrest warrant pawh nei loa man tumah a puh. He thil thleng a duh lohna lantir hian chaw ngheiin nawrh a huaihawt nghal a ni. 

CBI chuan Kolkata-a thil thleng chungchang hi Supreme Court-ah a thlen a, nimin khan Chief Justice of India Ranjan Gogoi kaihhruai judge pathum awmna bench chuan a ngaihtuah a ni. CBI chuan Saradha leh Rose Valley chit fund scam chhuitu, Kumar-a kaihhruai Special Investigation Team hian finfiahna ṭhenkhatte thupin, thil dik lo titu company-te hum a tum niin an puh.  A kaihhruai team-in finfiahna an thehluhte chu a kim loin siamchawpte a ni tiin an sawi. Hei vang hian hemi chungchangah hian thu zawhfiah an tum tih Surpeme Court-ah hian an sawi. CBI hian West Bengal chief secretary, directorate general of police leh police commissioner-te chu court thupek palzutah an puh bawk. 

CJI kaihhruai bench chuan chit fund scam chhuina kawnga pui tura Kolkata police commissioner hrilh chu thil harsa a ni lo tih a sawi a, hei bakah hian chief secretary, DGP leh commissioner Kumar te pawh insawifiah tura hriattirna pek an nih tur thu leh, February 20 hmaa chhanna pe tura tih an nih tur thu a sawi. 

Hetihlai hian West Bengal counsel AM Shingvi chuan kum nga kalta chhung khan IPC-a sectoin 201 (destruction of evidence) hnuaiah Kumar-a lakah FIR thehluh a awm lo tih a sawi a, hetichunga a in dapsak an tumna chu police hotu dinhmun zahthlak leh hrehawm taka siamtumna a ni, a ti. 

CBI officer-te chet dana lungawi loa CM Banerjee-in chaw ngheia nawrh a huaihawt hi eptu pawl hrang hrangte chuan an thlawp thu an sawi. Banerjee-in Kumar-a man lo tura court-in thutlukna a siam chu lawmawm a tih thu a sawi. Chaw ngheia nawrh a huaihawt chu Rajeev Kumar tana a dilsakna a ni lo a, India ram mipuite tan, democracy leh ram danpui humhim a nih theihna tura ti a nih zawk thu a sawi.