UK-in Vijay Mallya thawn kir tura ngenna pawm

Bank loan cheng vaibel-chhe 9,000 chuang baa United Kingdom-a tlanchhia, Vijay Mallya-a India rama thawn kir tura sorkar laipui ngenna chu UK sorkar chuan Thawhṭanni khan a pawmsak ta. 

Vijay Mallya chuan UK sorkar thutlukna siam hi Special Immigration Appeals Commission (SIAC) hnenah a appeal leh thei dawn a, mahse ni 14 chhungin appeal-na hi thehluh a ngai ang. Appeal-na hi pawm a nih chuan a ngaihtuah nan hian thla eng emaw zat hun hman leh a nih rin a ni. 

Kum 63 mi, Vijay Mally hian a Kingfisher Airlines hminga bank hrang hranga loan a lak, cheng vaibelchhe 9,000 chu rul loin kum 2016 March 2 khan India ram a chhuahsan a ni. A airlines hi tunah chuan tihtawp a ni tawh bawk. Pawisa tam tak ba a neih vanga tlanchhia ni anga an puhna chu Mallya hian a pha thung a, Indian bank-a a ba-te rul tur hian a inpeih thu a sawi.