Rahul-an Congress president ni tura Gehlot-a ngenna a hnawl

Congress president Rahul Gandhi chuan Rajasthan Chief minister leh party senior leader, Ashok Gehlot-a'n party president ni chhunzawm zel tura a ngenna chu a hnawl a, Congress president nih tawh lo turin thutlukna a siam tawh tih a sawi. 

Ashok Gehlot hian Thawhṭanni khan a twitter-ah Rahul Gandhi chu an party  hruaitu ni chhunzawm tura theihna nei awmchhun nia party hruaituten an ngaih thu a sawi. India ram leh mipui ṭhatna tura Rahul inpek­na chu midang nena teh­khin chi a ni lo tih a sawi a ni. 

"Rahul Gandhi chauh hi tun dinhmuna party hruai theitu awmchhun niah kan ngaih nghet tlat a, ram tana a inpekna hi sawisel tur awm lo leh midangte tluk rual loh a ni," a ti. 

Lok Sabha inthlanpui neih zawh takah Congress party hi an chet ṭhat loh avangin Rahul hian mawh­phurhna lain, party president a nihna aṭanga a ban tur thu hi a puang a ni. Mahse party hruaitute chuan bang lo turin an ngen a, Rahul erawh chu ban a tum nghet hle thung. Nimin khan party worker eng emaw zat chuan Rahul Gandhi chu a thutlukna siam ngaihtuah ṭha tura ngenin, a nawrna atan chaw ngheia nawrh an huaihawt. 

Party worker-te hian New Delhi-a party headquarters kawtah chaw ngheia nawrh hi an huaihawt a ni.