Sonia Gandhi-in Road Transport Minister fakna lantir

United Progressive Alliance (UPA) chairperson Sonia Gandhi chuan nimina Lok Sabha inkhawma Question Hour hmannaah Road Transport Minister Nitin Gadkari hnathawh ṭhatte avanga a fakna a lantir. 

Nimina Question Hour hmanaah hian zawhna pahnih, Gadkari ministry enkawl pahnih kaihhnawihte sawiho a ni. Gadkari chuan ramchhunga kawngpui zauh leh siamna kawnga hmalakna hrang hrangte chipchiar takin a sawi a ni. Gadkari chuan MP zawng zawngte chuan an party nihnate dah ṭhain, an constituency tina a ministry hnathawh dan chu an fak thu a sawi a ni. 

Gadkari-an zawhna hrang hrangte a chhan zawh hnuah Madhya Pradesh-a BJP MP Ganesh Singh chuan Speaker Sumitra Mahajan-i hnenah Union Transport Minister hnathawh ropui tak takte chuan fak a phu tih a sawi. Hemi hnu hian Sonia Gandhi pawh lo dingin, minister chunga a lawmna lantir nan hian a dawhkan pawh a beng zui ve a, Congress MP dangte pawhin Gadkari hnathawh ṭhat lawmna lantirin an dawhkan an beng zui nghal bawk. 

Sonia Gandhi hian nikum August thla khan Gadkari hnenah hian a bial, Uttar Pradesh-a Raebareli-a kawng lama harsatna an neihte a thlen chungchang ṭha taka a lo ngaihtuah sak vangin lawmthu hrilhna lehkha pawh alo thawn tawh bawk a ni. 

Gadkari-an 'mi tupawh a inchhung vawngfel thei lo chuan, ram a enkawl thei lo ang' tia a sawi chu Sonia Gandhi fapa leh Congress president Rahul Gandhi pawhin a lo fak tawh bawk.