UP budget-ah bawng in enkawlna atan Rs vbch 647 dah

Uttar Pradesh Chief Minister Yogi Adit-yanath-a kaihhruai BJP sorkar chuan nimin khan 2019-20 budget a pharh a, budget tharah hian state chhunga bawng in enkawlna atan cheng vaibelchhe 647 an dah. 

Budget pharhtu state Finance Minister Rajesh Agarwal chuan 'Kanha Gaushala and Besahara Pashu Ashram' scheme hnuaiah UP-a rural area-a bawng in enkawlna atan cheng vaibelchhe 247.60 dahin, urban area atan cheng vaibelchhe 200 dah a ni bawk tih a sawi. 

Yogi-a kaihhruai sorkar hi kum 2017 March thla khan dingin, tun hi budget an pharh vawi ṭhumna a ni. Kum 2019-20  budget atan hian cheng vaibelchhe nuai 4.79 dah a ni a, hei hi kum hmasa budget aiin 12% in a tam zawk. 

UP sorkar hian bawng enkawlna lam bik pualin budget hran siam a ni dawn tih a lo sawi tawh a, kumin January thla khan state sorkar chuan thuchhuah siamin thingtlang lam biala bawng, enkawltu nei lote enkawlna hmun siamna atan corporate social responsibility (CSR) hmang turin a ti a ni. Bawng enkawlna in sakna tur hian beer leh Indian Made Foreign Liquor (IMFL) aṭanga chhiah lak a nih tur thu pawh a lo puang tawh bawk. 

Nikum December thla khan chief minister chuan chief secretary kaih-hruaina hnuiah bawng, enkawltu nei tawh lo te lo vulh a, lo enkawltute sum lama ṭanpuina pek dan tur ngaihtuahtu tur commitee din a nih thu a sawi. Municipal corporation chuan district tinah bawng hlamchhiah tawhte enkawlna tur hian cheng vaibelchhe 10 

ṭheuh a pek tur thu a sawi a ni.