Kar 3 chhunga hri kai tam ber ni thleng

India ramah Covid-19 hripui lengin ziaawm lam panin, hri kai hmuhchhuah pawh an tlahniam sawt  hman hle. Hetih lai hian Ningani khan ram pumah hri kai hmuh thar mi 13,193 awmin, kar thum chhunga hri kai hmuh thar tam ber ni a thleng. 

State tam zawkah hri kai thar hi tlahniam zel  mah se, Maharashtra state-ah erawh tun hnaiah an pung chho leh a ni. Tun hnaia hri kai hmuh thar zinga 75% chu Maharashtra leh Kerala state-a mi an ni. Ningania hri kai thar zinga 5,000 chu Maharashtra state-a mi an ni a, ni 75 hnua ni khata hri kai hmuh thar 5,000 an chuan lehna hmasa ber a ni. 

Maharashtra sorkar chuan hri darh tur venna atana kaihhruaina siamte khauh zawka kenkawh a ni dawn tih a sawi a, state mipuite chu inthlahdah lo turin a ngen. Dan siamte mipuiten an zawm ṭhat loh chuan hri darh zel tur venna atan an state-ah lockdown puan leh a ngai mai dawn niin a sawi. 

Boruak a ziaawm chhoh tak avangin mi tam takin face mask leh social distancing te an ngai pawimawh lo chho ṭan a, hei vang hian Mumbai civic body chuan face mask vuah lote man hna thawk turin marshal 5,000 dawn a ruai a, an zinga 300 vel chu rel station-ah dah an ni dawn tih thuneitute chuan an sawi a ni. Municipal Commissioner Iqbal Singh Chahal chuan home isolation dan, inneihna leh punkhawmnaa tel thei zat bituk bawhchhaite chu thubuai siamsak zel an ni ang, a ti. 

Health expert-te chuan Kerala-a zirna in hrang hrang hawn a ni chho leh, Mumbai-a suburban train service chhunzawm a ni leh ta chu hri kai rawn punchhoh leh chhan a ni thei niin an sawi. 

Union health ministry pawhin hri lengin ziaawm lam pan mah se, coronavirus chuan India ram a la chhuahsan lo tiin, mipuite chu Covid-19 laka invenna tura kaihhruaina siamte zawm chhunzawm zel a, inthlahdah mai lo turin a ngen.