India-China inbiak vawi 10-na nei leh dawn

India leh China chuan vawiin hian corps commander level inbiak ṭum 10-na an nei leh dawn. 

Vawiina inbiakna neihah hian Ladakh khawchhak lama Line of Actual Control (LAC) -a Pangong Lake kam aṭanga sipaite lakkir an nih hnua, fricton point dang - Depsang, Hot Springs leh Gogra aṭanga sipaite hnuhkir chungchang an ngaihtuah dawn a, inbiakna hi LAC-a China lam, Moldo-ah neih a ni ang. 

Ram pahnihten sipaite hnuhkir chungchanga inremna an lo siam tawh angin, China chuan a sipai, People's Liberation Army (PLA) te chu north bank-a Finger 8 lamah a dah dawn a, Indian Army pawhin an base chu Finger 3 bulah an sawn dawn tih defence minister Rajnath Singh chuan a lo sawi tawh a ni. India leh China hian north bank-a sipaiten patrol an neih ṭhin pawh tihtawp rih ve ve an remti tawh bawk. 

Nikum May 5-a Pangong Lake-a Indian Army leh PLA sipaite an intihbuai hnu aṭang khan ram pahnih sipaite inkar boruak hi a la ṭha hlei thei lo a, inremna kawng zawngin inbiakna nei fo tawh mah se an la inrem thei lo a ni. China chuan nimin khan a vawi khatna atan nikum June thlaa Galwan Valley-a India leh China sipaite intihbuainaah khan an sipai panga an thi tih a sawichiang ve ta. He inbeihnaah hian India chuan a sipai 20 an thi tih a lo sawilang tawh a ni.