J&K-a inbeihnaa firfiak 3 leh police 1 thi

Jammu and Kashmir-a Shopian district-ah nimin khan firfiak leh security force-te inbeihnaa firfiak pathum an thi a, Budgam district-a inbeihna dangah police pakhat thiin, mi dang pakhatin hliam a tuar bawk. 

Shopian district-a Badigam  hmunah hian Ningani zan aṭang khan police leh firfiakte hi an inbei ṭan tawh a ni. Security force-ten firfiakte an awm tih thu an dawn avangin helai bial hi an dap a, helho bihrukna hmun an hual  hnuah an inkap zui a ni. Police-te chuan firfiak pathum kahhlum an nih bakah, an bihrukna hmun aṭang hian silai leh a mu an man thu leh, firfiakte Lashkar-e-Taiba (LeT) nena inzawmna nei nia an rin thu an sawi. 

Budgam district-a Beerwah hmuna firfiak nen an inbeihnaa police thi hi Special Police Officer (SPO) Mohammad Altaf a ni a, hliam tuar hi SgCt Manzoor Ahmad a nih thu police-te chuan an sawi bawk.