CBI-in Kolkata police hotu Feb 9-a inlan turin ko

Central Bureau of Investigation (CBI) chuan Kolkata police commissioner Rajeev Kumar chu February 9 hian Shillong-ah thu zawhfiah tura inlan turin a ko. 

CBI leh Kolkata police hotute inkara inhriatthiam lohna awm chungchang hi Supreme Court chuan a lo ngaihtuah tawh a, Kumar chu CBI hmaa thu zawhfiah tura inlan turin a ti a, hemi rual hian CBI chuan an thil chhui an zawhfel hma chuan Kumar hi an man thei lo ang, a ti bawk. 

West Bengal-a investor-te sum tam tham tak tihchingpensakna, Saradha leh Rose Valley scam chungchang chhuitu, Rajeev Kumar kaihhruai Special Investigation Team (SIT) chuan finfiahna pawimawh tak takte thupin a tichhe ṭhen bawk niin CBI chuan a puh. He sum tihchingpennaah hian West Bengal-a rorellai, Trinamool Congress hruaitu eng emaw zat chu chhui zui mek an ni. 

Pathianni khan CBI officer-te chuan Kolkata-ah Kumar hi thu zawhfiah tura hruai an tum chu Kolkata police-ten lo dangin CBI official-te chu police station-ah an hruai a, an hreng zui a ni. West Bengal Chief Minister Mamata Banerjee-i pawhin CBI official-te hian arrest warrant nei loin police hotu hi an kal niin a sawi a, BJP thupek anga CBI-te chu cheah puhin, an thiltih dan aṭang hian India ram democracy leh danpuite humhim a ngai a ni, tiin nithum chhung nawrh a huaihawt zui a ni. Mahse Nilaini-a Supreme Court-in CBI leh Rajeev Kumar te inkar buaina a rel fel hnuah a nawrh pawh a titawp ve nghal a ni. 

CBI chief Rishi Kumar Shukla chuan a officer 10-te chu Kolkata-a awm lailawk turin a dah bawk a, an zingah hian  Superintendent of Police (SP) pakhat, Assistan SP pathum, Deputy SP pahnih leh inspector pahnih an tel. Anni hian chit fund scheme scam chungchanga inhnamhnawiha puh midangte thu zawhfiahna kawngah an pui dawn a ni.