AP CM-in special status phutin nawrh huaihawt

Andhra Pradesh Chief Minister Chandrababu Naidu chuan nimin khan an state tana special status phutin New Delhi-a Andhra Bhawan-ah chaw ngheia nawrh a huaihawt. 

Telugu Desam Party (TDP) hotu Naidu hian nawrh a huaihawt  hma hian Rajghat-ah Mahatma Gandhi zahna a hlan hmasa a, he hunah hian TDP MP leh party worker-ten an ṭawiawm. Rajghat aṭang hian Andhra Bhawan hi a pan a, ni khat awh chaw ngheia nawrh a huaihawt zui ngal a ni. Nawrh huaihawt hi Andhra Pradesh minister, party MLA, MLA leh MP ten an zawm ve bawk. 

Naidu hian vawiin hian President Ram Nath Kovind-a hnenah memorandum a thehlut ang. 

Nawrh huaihawt tura New Delhi a thlen hnuah, Andhra Pradesh CM hian Prime Minister Narendra Modi chu roreltu ṭha lo tak tiin a bei zui nghal. Naidu hian PM chu lehkha thawnin, "Prime Minister dinhmun chelhtu chuan roreltuin a tih turte a ti tur a ni. Prime Minister lo ni tawhten hetianga nawrh khum hi an tawk nasa ngai lo. I kalna apianga an nawrh khum che a, hei hi i rorelna ṭhat lohzia tichiangtu a ni", a ti. 

Naidu chuan Modi hi bei chhunzawmin, state a tlawh dawna chief minister-te biakrawn hmasak chu tihdan mawi a ni tih a sawi. "Prime Minister-in state a tlawh dawn chuan a kalna tur state chief minister biakrawn hmasak chu tihdan phung leh mawi a ni, sawmnaah pawh an hming a tilang ve tur a ni. Mahse i thiltih dan hian i tihdan phung ṭha lo tak leh regional leader-te in ngaih pawimawh loh zia a tilang a ni" a ti. 

PM hi Pathianni khan Andhra Pradesh-ah public  rally nei turin a kal a, mahse a kal tur chungchang hi state CM hi engmah a hriattir lo nia sawi a ni. PM Modi hian thu a sawiah state CM hi na taka beiin, an state mipui duhthusamte tihchhiat sakah a puh a, ama hamṭhatna uma politics khelah a puh a ni. 

Kum 2013 khan Naidu hian Andhra Pradesh Bhavan-ah hian Andhra Pradesh aṭanga state hran siam a nih chuan, state pahnihte chuan angkhata enkawlna leh dikna chanvo inang an nei tur a ni, tiin tiam chin awmloa chaw ngheia nawrh a lo huaihawt tawh bawk. A nawrh ni nga-naah a taksa a chauh vangin Ram Manohar Lohia Hospital-ah dah luh a ni. 

Kum 2018, April 20 khan TDP hotu hian an state tana special status phutin Vijayawada-ah chaw ngheiin nawrh a lo huaihawt tawh bawk. 

BJP kaihhruai NDA sorkarin Andhra Pradesh tana special status a pek duh loh vangin TDP hian nikum khan NDA a thawhpuina a titawp tawh a ni. 

Prime Minister hlui Manmohan Singh chuan AP CM-in special status phuta nawrh a huaihawt chu a thlawp thu a sawi a, sorkar laipui chuan a thu lo tiam tawh chu tikhawtlai tawh loin a tihlawhtling nghal tur a ni, a ti. 

Andhra Pradesh state ṭhendarh a nih laia UPA sorkar-a prime minister dinhmun chelhtu, Singh chuan Parliament-a AP tana special status pek chungchang sawiho a nih lai khan party zawng zawngin an thlawp vek tih a sawi. Congress hruaitu Anand Sharma pawhin AP state ṭhen a nih lai khan special status hi pek a ni ang tia lo puan vek tawh a ni tiin, PM Modi chu Pathianni-a Guntur-a rally a neihnaah Naidu a beihnaa a ṭawngkam hmante a sawisel zui bawk. "Hei hi Prime Minister tih dan tur a ni lo. Politics hi dinhmun hniam takah a hnukthla tawh a, hei vang hian a dodal tura insuihkhawm hi kan tum ta a ni" a ti.