India-ah hri kai thar mi 14,264 hmuh belh
Union health ministry chuan nimin khan darkar 24 liam ta chhungin India rama Covid-19 hri kai thar chu mi 14,264 an awm tih a tarlang a, hemi hun chhung vek hian hripui vang hian mi 90 thi an awm tih a tarlang bawk. Kar liam ta Inrinni khan India ramah Covid-19 hri la kai vek, active case hi mi 1,43,127 an la awm a ni.
India ramah Covid-19 hri lengin ziaawm lam a pan mek laiin, kar liam ta aṭang khan hri kai thar hi an pung chho leh ṭan. Kar liam ta, ni sarih chhung khan ram pumah hri kai hmuh thar hi mi 87,000 an tling. State tam zawkah hri leng hian ziaawm lam a pan laiin, state panga - Kerala, Maharashtra, Punjab, Chhattisgarh leh Madhya Pradesh-ah hri kai hmuh chhuah hi an pung leh a ni. Ram puma hri la kai mek zinga 75.87% chu state pahnih, Maharashtra leh Kerala-a mi an nih thu union health ministry chuan a tarlang.
Pune-ah zan curfew puang
Pune district administration chuan vawiin aṭanga hman ṭan turin nimin khan zan lam curfew a puang. Hei bakah hian school leh college chu kar rih turin district administration chuan a ti bawk.
Zirna in hi February 29 thleng khar rih tur a nih thu district administration chuan a tarlang a, hotel, restaurant leh inneihna hmun chu zan dar 11 thleng hawn phal a ni. Inneihna hmun leh mipui punkhawmna hmunah hian mi 200 aia tam pun khawm erawh khap a ni thung. Zan dar 11 aṭanga zing dar 6 chung curfew puan a ni.
Maha-a district pangaah inkhuahkhirhna siam
Maharashtra-a district panga Amravati, Akola, Yavatmal, Buldana leh Washim-ah hri kai an pun chak leh avangin inkhuahkhirhna siam a ni a, heng district zinga pahnihah hian partial lockdown hman a ni.
State Relief and Rehabilitation Minister Vijay Wadettiwar chuan an state-a district eng emaw zatah nitin hri kai hmuh thar an pung chho chak hle tih sawiin, district magistrate tin hnenah hri darh tur venna atana kaihhruaihna siamte khauh taka kengkawh tura hriattir an ni, a ti.
Inrinni liam ta khan Maharashtra-ah hian Covid-19 kai hmuh chhuah thar 6,281 an awm a, he hri vang hian mi 40 an thi bawk. An state-a hri kai hmuh chhuah tawh hi mi 20,93,913 awm tawhin, an zinga 19,92,530 chu enkawl dam an ni tawh a, hri kai mek hi 48,439 an la awm. Covid-19 vanga thi hi an state-a hian mi 51,753 an tling tawh a ni.