India leh China aiawhte darkar 16 chuang inbia

Ramria buaina avangin vawi tam India leh China chuan inbiakna an nei tawh a, kar liam ta Inrinni khan Corps Commander level-a an inbiak vawi 10-na neih leh a ni a, ram pahnih aiawhte hi darkar 16 chuang zet an inbia a ni. 

Kar liam ta Inrinni zing dar 10 aṭang khan India leh China hian ramri chungchangah inbiakna nei ṭanin, nimin zing dar 2 vel khan an zo fel thei hram a ni. Inrinnia inbiakna an neihah hian ram pahnihte intihthiam lohna Ladakh chhak lama Gogra heights, Hot Springs leh Depsang plains-a an hmalak duh dan te an sawi a, an inbiakna hi a hlawhtling niin media-te chuan an tarlang.

February 11 khan he defence minister Rajnath Singh chuan parliament-ah Pangong Lake-a India leh China intihbuaina chu inremna siam hmanga tihtawp thuai a nih dawn thu a sawi a, Singh chuan inremnaah hian China-in Pangong Lake hmarchhak lama finger 8-a sipai a dah chu hnuhkir dawn tia sawiin, finger 3 huamchhunga Dhan Singh Thapa Post chu India sipaite awmna hmun pakhat atan a nih tur thu a sawi a ni. 

Inrinnia inbiaknaah hian India lam aiawhte hi 14 Corps Commander Lt Gen P.G.K. Menon chuan a ho a, People's Liberation Army (PLA)-a South Xinjiang military district commander Maj Gen Liu Lin chuan China lam hi a ho ve bawk.