Farm law sût duh thu sawitu state an awm lo : Niti Aayog VC
Niti Aayog vice chairman Rajiv Kumar chuan Inrinni liam taa Niti Aayog governing council meeting vawi rukna an neiha tel state zingah farm law sut duh thu sawitu an awm lo, a ti.
Meeting zawha news conference a neihah, Kumar chuan meeting-ah tumahin farm law chungchang hi an sawichhuak lo tih a sawi. "State ṭhenkhat chuan farm sector kaihhnawih thilte chu an sawi ngei a, mahse eng state mahin farm law chungchang leh, heng dan tharte sut an duh thu hi an sawi lo," tiin, agricultural sector tihhmasawn dan chungchang chauh an sawiho niin a tarlang.
Niti Aayog CEO Amitabh Kant chuan farm sector kaihhnawih hrang hrang, cropping system, agro climatic condition, water conservation, horticulture, fisheries and animal husbandry, food processing, agro based industries leh export chungchangate sawiho a nih thu a tarlang bawk.
Hetih lai hian ramchhunga loneitute chuan farm law thar duh lohna lantirin nawrh an la huaihawt chhunzawm reng thung. November 26,2020 aṭang khan loneitute hian farm law thar pathum chu sut tura phutin Delhi border-ah lungawi lohna lantirin an inkhuar a, Pathianni kha nawrh an huaihawt ni 88-na a ni tawh. Delhi border-a loneitu nuarte zinga a tam ber hi Punjab leh Haryana state aṭanga kalte an ni.