RS-ah CAB pharh hmain inkhawm titawp

Nimina Rajya Sabha rorel inkhawmah Samajwadi Part MP-te chu an party hotu, Akhilesh Yadav-a Lucknow airport-a dan a nih avanga lungawi loin an au buai nasa hle a, hei vang hian Citizenship Amendment Bill, 2016 pharh hmain Rajya Sabha inkhawm pawh nimin atan tihtawp a nih phah a ni. 

SP hotu leh Uttar Pradesh chief minister hlui Akhilesh Yadav hi Prayagraj-a Allahabad University Students Union function hmanpui tura kal a ni a, mahse Lucknow airport-ah police-ten an lo dang.

Allahabad University Students Union president atan hian Samajwadi Party student wing, Samajwadi Party Chatra Sabha member thlan a ni a, hruaitu thar lakluhnaa telpui tur hian Yadav hi a sawm a ni. Mahse state sorkar chuan he huna a tel hi remti loin a lo dang niin a sawi a, hetihlai hian Allahabad University pawhin university-a hun hmanah politician-te inrawlh an duh loh thu sawiin Akhilesh Yadav pawh hi kal lo turin a personal secretary pawh an hriattir niin an sawi. 

Rajya Sabha-ah SP member-te lungawi loa an aubuai avang hian ngaihven hlawh tak, Citizenship Amendment Bill, 2016 pawh pharh a ni ta lo a ni. Bill hi Union Home Minister Rajnath Singh-an a pharh dawn nia sawi a ni. 

Ram pathum, Bangladesh, Pakistan leh Afghanistan aṭanga kum 2014, December 31 hmaa India rama pemlut, Muslim ni lote India khua leh tui nihna pek theihna tur, CAB hi eptu party-ten an dodal a, a bikin hmarchhak bialah nasa taka dodalin, bill duh lohna pawh lantir chhunzawm reng a ni. 

Rajya Sabha-ah pharh tum a nih vang hian nimin pawh khan hmarchhak hmun hrang hrangah bill duh lohna lantir a ni. CAB hi January 8 khan Lok Sabha-ah pass a lo ni tawh.