Congress-in Rafale deal chung-chang JPC chhui chiantir phut

Nimina Lok Sabha inkhawmah rorellai, BJP kaihhruai NDA sorkar chuan Rafale jet fighter deal chungchanga Comptroller and Auditor General (CAG) report a pharh. Congress party chuan Rafale fighter jet leina tura inremna siam a nih dan chu joint parliamentary committee (JPC) chhui tir an phut. 

Congress party chuan France aṭanga Rafale fighter jet 36 leina tura sorkar laipui leh France-in inremna an siam danah eirukna leh thil dik tawk lo a awm nia sawiin chhui chian an phut a ni. Mahse union minister Rajnath Singh chuan eptute puhna hi thu dik tawk lo niin a sawi thung. 

Congress kaihhruai United Progressive Alliance (UPA) sorkar khan France aṭanga Rafale fighter jet 126 leina turin dollar tluklehdingawn 12 in inremna a lo siampui tawh a, mahse kum BJP kaihhruai NDA a sorkar hnuah he inremna siam tawh hi sutin, kum 2016 khan Rafale fighter jet 36 leina turin dollar tluklehdingawn 7.87 inremna a siam tharpui leh a ni. He inremna siamah hian fighter jet bakah MICA missile, Meteor Missile, Weapon package bakah performance-based logistic leh specific enhancement leh associated supplies te a huam tel tir a ni. 

NDA sorkarin Rafale deal a siam danah eirukna leh sumdawng lian Anil Ambani duhsakna hleihluak taka lantirna awmah puhin Congress party chuan BJP a bei reng a, PM Modi-a chu Ambani palai anga ṭangah hial an puh a ni. He inremna siamnaah hian PM hi a inrawlh lo takzet a nih chuan JPC chhuichian an remti ngei tur a ni, an ti.