Delhi-a hotel kangah mi 17 thi

New Delhi-a Karaol Bagh area-a hotel pakhatah nimin zing khan kangmei a chhuak a, mi 17 an thi. Delhi sorkar chuan kangmei chhuah chhan hi chhui chiang turin thupek a tichhuak nghal. 

Delhi Fire Service official-te chuan zing dar 4:35-ah Gurudwara Road-a Hotel Arpit Palace-a kangmei a chhuah thu an dawng tih sawiin, kangṭhelhtute pawh tirh nghal an nih thu an sawi.

Kangmei chhuakah hian mi 17 an thih bakah midang pahnihin hliam an tuar. Thi zinga a tam zawk hi boruak tlakchham vanga thi an ni a, pahnih erawh chu tlanchhuah tuma tukverh aṭanga an zuan thlaknaah an thi. Mi 35 te chu him taka chhanchhuah an ni. 

Delhi minister Satyander Jain chuan kangmei chhuak chungchangah kangmei laka himna tura sorkarin kaihhruaina a siamte an zawm lo a nih chuan mawhphurtute chu hrem ngei an ni dawn tih a sawi.

Hetihlai hian Delhi Hotel Association vice president Balan Mani chuan Hotel Arpit Palace hian rules leh regulations-te ṭha taka a zawm thu a sawi thung.