China-in ramri bula airport tichangtlung

China chuan Tibet-a India ramri hnaih tak, Goggan-a civil airport pakhat chu a chei ṭha mek a, hei bakah hian Tibet chhim lam Burang, Lhunze leh Tingri-ah airport thar pathum siam a tum bawk. 

China media report-in a tarlan danin heng airport thar siamna atan hian US dollar tluklehdingawn 2.6 ruahman a ni a,  kum 2021-ah zawhfel hman tum a ni. 

India leh China hi ramri chungchangah intithiam lohin, Doklam-ah sipaite pawh hun eng emaw chen an lo inep tawh a, an buaina hi reh tawh mah se ram pahnihte hian border area-ah defence lam thuam chakin hma an la zui reng a ni. 

China People Liberation Army (PLA) chuan border area-ah military camp thar eng emaw zat a siam a, hei bakah hian intelligence lamin thu an dawn danin Arunachal Pradesh aṭanga km 900 vela hla, Yuxi-a guided missile unit a rukin a dah bawk nia sawi a ni. He hmunah hian China chuan '622 Missile Brigade' a dah nia sawi a ni bawk.