Delhi vs Centre : SC-in thuneihna changtu tur relsak

Delhi sorkar leh sorkar laipuiin Delhi-a thuneitu zawk nih an inchuhnate chu nimin khan Supreme Court chuan ngaihtuahin a rel fel sak. 

Supreme Court chuan Delhi anti-corruption bureau chu sorkar laipui thuneihna hnuaiah a dah a, hei hian Delhi-a rorellai AAP sorkar a tilungawi lo hle. AAP chuan sorkar hnathawktu eirute chungchang chhuina kawnga thuneihna chu mipui thlan sorkar kutah a awm tur a ni tiin a lo sawi fo tawh a ni. Court chuan inquiry commission ruatna tura thuneihna chu sorkar laipui kutah a dah bawk. 

Hetihlai hian Justice AK Sikri leh Ashok Bhushan awmna bench chuan Delhi-a officer-te chungchanga thuneitu tur zawk erawh a rel fel thei lo a, bench sang zawk ngaihtuah turin a dah. 

Power distribution companies, Discoms director-te ruat tura thuneihna chu Delhi sorkar kutah dah a ni a, hei bakah hian agricultural land rate leh special public prosecutor ruat chungchang pawh Delhi sorkar thuneihna hnuaiah dah a ni. Mahse hemi chungchanga ngaihdan inmil lo a awm a nih chuan, Lieutenant Governor leh Delhi sorkar chuan President hnenah an thlen thei dawn a ni. 

Kum  2015 aṭang khan Delhi anti-corruption bureau chunga thuneitu zawk inchuhin Delhi sorkar leh sorkar laipui hi an lo innawr fo tawh a ni. Delhi hi state puitling a nih loh avangin Delhi sorkar hian thuneihna pumhlum a chang lo a, sorkar laipui hnuaiah land, law and order leh police-te an awm a ni.