Delhi-a buaina chhuaka mawhphurtuah BJP puh
National Congress Party (NCP) hotu Sharad Pawar chuan tun hnaia Delhi hmarchhak biala buaina nasa tak chhuak chung changah BJP kaihhruai sorkar laipui chu beiin, he buaina chhuakah mawhphurtu berah a puh.
NCP chuan rorellai, BJP chuan Delhi assembly inthlan neih zawh takah hnehna a chan loh avangin inhuatna chawk tho tur politics a khel zui ta a ni, a ti. Mumbai-a NCP convention a hmanpuinaah he thu hi sawiin, Pawar chuan prime minister Narendra Modi leh union home minister Amit Shah-te chu Delhi inthlan dawna an thusawi danahte a sawisel zui bawk.
NCP hotu Delhi inthlan dawna an campaign-naah, Modi, Shah leh union minister dangte chuan khawtlang mipuite ṭhendarhna leh, khawtlang boruak muanawm tichhe thei dawnin thil an ti a ni, a ti. PM Modi-an buaina siamtute chuan an kawr hak aṭangin an hriat theih vek dawn tia a sawite kha mak a tih thu sawiin, "Ram khat prime minister chu sakhaw hrang hrang, state hrang hrang mipuite ta a ni.
Ram pum ta a ni a, chutiang ni chunga inthlan dawna sakhaw kawh bik nei thei zawnga thil a sawi hi thil pawi tak a ni," tiin a sawi. Delhi hmarchhak lam biala Citizenship Amendment Act (CAA) duh lohna lantirnaa CAA thlawptu leh dodaltute inkara buaina chhuak vang hian mi 46 in nunna an chan a, mi 300 chuang an hliam bawk.