Mamata hian CAA hi a dang thei dawn lo : Amit Shah

Union home minister Amit Shah chuan Kolkata-a rally neihna hmuna thu a sawiah, West Bengal chief minister leh Trinamool Congress (TMC) hotu Mamata Banerjee chuan raltlante hnena India khua leh tui nihna pek theihna tur, Citizenship Amendment Act (CAA) chu eng kawng mahin a dang thei dawn lo tih a sawi. 

Mamata Banerjee hi CAA dodaltu langsar tak niin, an state-ah chuan hman a ni ve dawn lo tih pawh a sawi fo a ni. Amit Shah chuan eptu party-te chuan CAA chungchang chu dik lo taka thehdarhin, raltlante chu thlabarin an siam a ni, a ti. Mamata chu an state-ah CAA duh lohtuten buaina an siam pawh phalsakah a puh zui bawk. 

"PM Modi chuan Bengal-a raltlan tam tak awmte khua leh tui nihna pek an nih theihna CAA a siam a, mahse Mamata hian hei hi a dodal tlat thung. CAA duh lo ten buaina siamin, rel leh rel station-te hal an ni bawk," tiin Mamata chuan eng ang pawn dodal  mah se CAA chu a dang thei dawn chuang lo tih a sawi. 

Trinamool Congress chuan Amit Shah hi chhang letin, hetiang thu sawi loin Shah chuan Delhi-a buaina nasa tak chhuak vanga mi pawisawi lo tam takin nunna an chan avanga ngaihdam dil zawk turin a ti. TMC ho tu Abhishek Banerjee chuan inhuatna thehdarh tum tu, BJP tel loin West Bengal chu a ṭha zawk tih a sawi.