Awantipora attack : Sipai convoy beihnaah CRPF 38 thi NSG, NIA team-ten J&K an thleng

Jammu and Kashmir-a Pulwamna district-ah Ningani tlai dar 3:15 vel khan Central Reserve Police Force (CRPF) sipaite chuanna convoy chu thihchilh bomb hmanga beih an ni a, sipai 38 in nunna an chan. Hei hi J&K-a firfiakte beihna vanga ṭum khat sipai an thih tam ber ṭum a ni. 

Thihchilh bomb puaka sipai thi zat hi a tirah 44 nia sawi ni mah se, nimin khan CRPF chuan thi zat hi 38 an nih thu a sawichiang a, hliam tuar eng emaw zat an awm bawk. 

CRPF sipai 2,547 te chuan bus 78 hmangin Jammu aṭangin Srinagar an pan a, Pulwama district-a Ladhu Modi Lethpora-a Srinagar-Jammu National Highway-a an tlan laiin beih an tawk ta a ni. Sipaite beitu hi Pakistan firfiak pawl,  Jaish-e-Mohammed (JeM) suicide bomber niin, a motor Scorpio SUV-in sipaite chuanna bus hi a su a, a bomb phurh kg 300 dawna rit chu a tipuak zui nghal a ni. Bomb puak hi a na hle a, bus eng emaw zat a chhia a,  ruang ṭhenkhat chu bomb puahna aṭanga meter 100-a hlaah te hmuh an ni.  

Jammu and Kashmir-a sipaite beihna thleng vang hian  National Security Guard (NSG) expert team leh National Investigator Agency (NIA) investigator-te chuan nimin khan Jammu and Kashmir hi an pan nghal a, pawikhawihna thlen dan hi an chhui dawn a ni. Home ministry official chuan NIA team hian forensic expert an hruai nghal bawk niin a sawi. 

Pawikhawihna thlen hnu lawkah hian JeM chuan an pawl tih a nih thu sawiin, bomb tipuaktu, commander tia an sawi Adil Ahmad Dar video clip pawh an tichhuak nghal a ni. He video clip hi sipai phurtu motor a beih hma lawka a lak niin an sawi. 

Cabinet Committee on Security (CCS) chuan nimin khan Jammu and Kashmir security dinhmun sawihoin meeting an nei nghal. CSS hi Prime Minister Narendra Modi-an kaihruaiin, member-ah hian Defence Minister, Home Minister, External Affairs Minister leh Finance Minister-te an tel. Meeting zawh hnu hian Finance Minister Arun Jaitley chuan Pakistan hnena Most Favoured Nation (MFN) status pek chu hnuhdawh a nih thu a puang nghal a ni.

Sorkar laipui chuan CRPF sipaite beih an nih chungchang sawiho tur hian vawiin-ah all party meeting a ko nghal bawk. Hei hi firfiakte pawikhawihna thlen vanga kum 2016 hnua sorkarin all party meeting a koh lehna hmasa ber a ni. 

Prime Minister Narendra Modi chuan sipaite beitu,  firfiakte chet dan chu demawm leh tenawm tak a nih thu a sawi. PM chuan Pakistan vau nghalin, he pawikhawihna hian India chakna a tihnep phah dawn lo a, pawikhawihna thlenga mawhphurtute chuan a man an tel ngei dawn a ni, a ti. Modi chuan firfiakte lakah beihpui thlak turin sipaite chu zalenna pek an ni dawn tih a sawi a, Ningani-a pawikhawihna thleng hian mipuite thinurna a tawng baw tawh a ni, a ti. PM hian he thil thleng vang hian nimina Uttar Pradesh leh Madhya Pradesh-a function-a a tel tur pawh a ṭhulh phah a ni. 

Nimin khan Home Minister Rajnath Singh chuan thil awmdan thlithlai turin Srinagar a pan nghal. Ningani zan khan Singh chuan Pakistan-sponsored Jaish-e-Mohammed firfiak pawl pawikhawihna thlen chu sorkarin phuba a la ngei dawn tih a sawi. Thuchhuah a siamah, Singh chuan sorkar laipui chuan India ram muanna boruak tichhiat duhtute chu a lo dang zel dawn tih a sawi a ni. 

zhna thleng chu an dem thu leh, sipai thi chhungte an tuarpui thu an sawi. Congress president Rahul Gandhi chuan an party leh eptu party dangte chuan he thil thlengah hian sipaite leh sorkar chu an thlawp tlat tih sawiin, eng ang huatna leh pawikhawihna mahin India innghahchhan chu a tichhe thei lo, a ti.  

Ram hrang hrang hruaitute pawhin J&K-a sipai convoy beih a ni chu an dem thu an sawi a, firfiakte do let tura thawhho a ngaih thute an sawi a ni. White House chuan thuchhuah siam nghalin, Pakistan sorkar chu firfiakte a thlawpna titawp tur leh, a ram chhunga firfiak pawlte zalen taka an awm a phalsakna pawh titawp nghal turin a ti.  

Pakistan Ministry of Foreign Affairs pawhin pawikhawihna thleng hi a dem thu a sawi a, hemi rual hian engmah chhuichianna awm loa he pawikhawihna thleng leh Pakistan sorkar sawizawm a India sorkar leh media-ten thu an thehdarh chu an pawm loh thu a sawi. 

Ningani-a sipaite chuanna convoy beitu, JeM suicide bomber hi kum 22 mi, Adil Ahmad Dar a ni tih hriatchian a ni tawh. Dar hian kum 2017, March thla khan Gundibarh-a Class 12 a zir laiin a bansan a, kum 2018 aṭang khan chin hriat loihn a awm zui a, Pakistan firfiak pawl JeM hi a zawm nia sawi a ni. Firfiak pawl, Lashkar-e-Toiba, Jaish-e-Mohammed leh Hizbul Mujahideen member-te nena an awmho lai pawh hmuh a nih thu report a awm bawk. Dar hi bomb a tihpuahna hmun aṭanga km 10 leka hlaa cheng a ni. 

Firfiak pawl pawikhawihna thleng vanga sipai 38 zet an thihphah avangin nimin khan ramchhung hmun hrang hrangah lungawi lohna lantir a ni. Jammu and Kashmir-ah chuan ṭhalaiten lungawi lohna lantirin, CRPF sipai 38 zet thah an ni chu pawi an tih thu leh an dem thu sawiin, hei hi ram tan pawha thil zahthlak tak a ni tiin, sorkar laipui chu surgical strike nei leh tura an phut thu an sawi. Jammu khawpuiah chuan nawrh huaihawtte hian tharum thawhna thlenin motor-te an tihchhiat bakah an  hal bawk a, hei vang hian curfew puan zui a ni. 

Maharashtra, Uttar Pradesh, Rajasthan, Madhya Pradesh, Punjab leh state dangahte pawh lungawi lohna lantir a ni a, Pulwama-a pawikhawihna thleng chu an dem thu sawiin, sipai martar te leh an chhungte tan rorelna dik an phut thu an sawi. 

Thihchilh bomb puaka sipai 38 zinga a tam zawk ruang chu tunge an ni tih hriatfiah a ni tawh a, ṭhenkhat ruang erawh chu tunge an nih tih hriat theih loh khawpin a chhe nasa a ni. Sipaite ruang hi nimin khan Srinagar-ah zahna hlanin an thlah a, hemi hnu hian an chhungte hnenah, an khaw lamah thawn tura ruahman a ni. Sipai thite thlahnaah hian Union Minister Rajnath Singh bakah Governor Satya Pal Malik leh CRPF DG RR Bhatnagar te pawh an tel a ni. 

Sipai thi zinga 12 hi Uttar Pradesh mi an ni tih hriatchian a ni tawh a, Uttar Pradesh sorkar chuan sipai thi chhungte hi ralna, cheng nuai 25 ṭheuh a pe dawn tih nimin khan a puang. Hei bakah state sorkar chuan sipai martar chhungte zinga pakhat ṭheuh chu sorkar hna a pe dawn bawk.