Ruahsur-in Mumbai khawpui a tibuai

Mumbai khawpui chuan ruahtui tlak tam avangin harsatna nasa tak an hmachhawn mek a, kum 10 chhunga ruah sur nasat ber ṭum an hmachhawn a ni. 

Thuneitute chuan mipuite chu emergency thil a nih loh chuan pawn chhuak lo turin an ngen hial a ni. Ruahsur nasat avang hian nimin zing khan Malad-a Kurar area-a retaining wall chim in chenna-in eng emaw zat a chhilh a; mi 18 an thi a, mi 60 chuangin hliam an tuar bawk.

Hliamte hi Jogeshwari's Trauma Care Hospital, KEM Hospital, Shatabdi Hospital, M W Desai Hospital leh Andheri's Cooper Hospital-ahte hruai nghal an ni.In chim hnuaiah hian tang an la awm rin a nih thu Mumbai Fire Brigade-te chuan an sawi a, chhanchhuah leh chhawmdawl hna pawh kalpui mek a nih thu official-te chuan an sawi.

Ruahsur nasa avang hian zirna-in hrang hrangte khar a ni a, Mumbai University exam hun tur pawh sawn hlat a ni. Mumbai chief minister Devendra Fadnavis chuan twitter-ah Malad bang chim vanga nunna chan an awm chu pawi a tih thu sawiin; mitthi chhungte chu a rilruah an awm reng thu leh hliam tuarte an lo dam vat theih nan a ṭawngṭai thu a sawi. Mitthi chhungte hnenah zángnadawmna cheng nuai nga ṭheuh pek an nih tur thu a sawi bawk.