UN Palestine refugee agency tan USD mtd. 5 pek tiam
India chuan kumin chhungin UN Palestine refugee agency tan US dollar maktaduai nga pek a tiam.
India Deputy Permanent Representatives to UN Ambassador K Nagraj Naidu chuan India sorkarin United Nations Relief and Works Agency for Palestine Refugees in the Near East (UNRWA) core budget atana sum a thawh ṭhin pawh kum 2016-a USD mtd. 1.25 a pek chu kum 2018-ah USD mtd. 5-ah a tipung tawh tih a sawi. Kumina pawh nikuma pek ang zat bawk chu pek tum leh a nih thu a sawi a ni.
Naidu chuan kumina UNRWA budget USD tluklehdingawn 1.2 chu USD maktaduai 200 chuang zetin phak a la a ni lo a, hei vang hian Palestinian raltlante chhawmdawl hna thawhna kawngah pawh harsatna a awm tih a sawi. UNRWA in sum lama harsatna a tawh hian raltlante ṭanpuina, a bikin education leh health service lamin a tuar theih thu a sawi.
India chuan UNRWA donor dangte hnenah pawh an sum pek zat tipung turin a ngen a, non-donor member ramte pawh Palestinian raltlante chhawmdawlna atan agency hnenah ṭanpuina pek chungchangte ngaihtuah ṭha turin a ngen bawk.
UNRWA hian Jordan, Lebanon, Syria, West Bank leh Gaza Strip-a Palestinian-te chhawmdawl hna hi kum 1950 aṭang khan a lo thawk ṭan tawh a ni. Tunah hian agency hian Palestinian refugee maktaduai 5.4-te a chhawmdawl mek a, hei hi khawvel puma raltlan awm zat aṭanga 20% an tling pha a ni.