Yogi sorkarin OBC hnena SC certifi-cate-a pek hi dan kalh: Sorkar laipui

Sorkar laipui chuan nimin khan thu­pek tichhuakin, Uttar Pra­desh-a Yogi Adityanath kaihhruai BJP sorkarin Other Backward Class (OBC) caste 17 hnena Scheduled Caste certificate a pekchhuah chu titawp turin a hriattir.

Union minister for social justice and empo­werment Tawar Chand Gehlot chuan UP sorkar hmalakna chu thil dik a nih loh thu leh ram danpui kalh a nih thu a sawi. 

Rajya Sabha-a thu a sawinaah Tawar Chand Gehlot chuan SC list-a OBC telh chungchang chu Parliament thuneihna hnuai aṭang lo chuan tih theih a ni lo tih sawiin; state sorkar chu a nih dan ang tur taka hma la mai turin a ti.

Allahabad High Court-in 2017-a enfiahna a neih behchhanin UP-a Yogi Adityanath kaihhruai BJP sorkar hian OBC caste 17-te chu SC certificate an pe a, hei hi dan ang thlapa an document-te an enfiah hnua ti an nih thu state sorkar lam chuan an sawi a ni.

State sorkar hian heng caste 17-te SC certificate a pekchhuah chhan hi social leh economic lamah nasa taka an hnu­fual vang tih an sawi. SC list-a telh an nih hian hamṭhatna eng eng emaw an hmu theih phah dawn tih an sawi bawk.

Hetihlai hian SC community-te chuan hei hi an helh hle a, hun lo kal zel turah an quota neihah nghawng ṭha lo tak a la neih an hlau a ni.