Congress president ka ni tawh lo : Rahul Gandhi

Congress party hruaitu chungchanga buaina a la reh thei lo a, party hruaitu tam zawkin Rahul Gandhi chu party president atana awm chhunzawm zel tura an nawr laiin Rahul chuan Congress president a ni tawh lo tih a sawi. 

Rahul Gandhi chuan party president a ni tawh lo a, hei vang hian an party chuan a rang thei ang berin president thar a thlan a ngai a ni, a ti. "Ka banna ka thehluh tawh avangin party president ka ni tawh lo. Congress Working Committee (CWC) chuan a rang thei ang bera meeting koin an tihfel thuai a ngai tawh a ni," a ti. 

Lok Sabha election 2019-a Congress party an chet ṭhat tawk loh avangin Rahul Gandhi hian mawhphurhna lain party president a nihna aṭanga banna a thehlut a ni. Hetihlai hian party hruaitute chuan an pawm lo tih an sawi a, party worker tam takin bang lo turin an nawr reng bawk. Mahse Rahul Gandhi chuan a thutlukna siam tawhah a ding nghet dawn tih sawiin, an ngenna chu a pawm lo tih a sawi a ni. 

Party dangten Gandhi chhung­kaw inthlah chhawngin Cong­ress an hruai chungchanga an beih fo avangin Rahul Gandhi chuan party president thar tur chu Nehru-Gandhi chhungkua ami ni lo se a duh thu a sawi. Meeting-ah party hruaitu ṭhenkhatin amah thlaktu atana a farnu Priyanka Gandhi Vadar an rawt pawhin Rahul hi a lawm lo hle nia sawi a ni. 

Congress hruaitu lawkten a banna thehluh hi hnukdawk leh turin theihtawpin ngen mah se, Rahul Gandhi chuan a thutlukna siam tawh hi sut a tum lo bur tih a sawi. Youth Congress pawhin Rahul hi party president ni chhunzawm zel tura ngenin Delhi-a party headquarters kawtah sit-in protest-te an huaihawt hial bawk.