Parliament-ah Economic Survey 2019 pharh
Union finance minister Nirmala Sitharaman chuan nimin khan Lok Sabha-ah Economic Survey 2019 a pharh.
Economic Survey 2019 hi Chief Economic Advisor K Subramanian buatsaih a ni a, Prime Minister Narendra Modi-a'n kum nga chhunga 5-trillion dollar economy neih hman a tum dante tarlan a ni. Survey-ah hian India ram mipuite dam chen a san chhoh zel avangin pension kum pawh tihsan rawt a ni. Ram dangte pension kum hman mek dante pawh ngaihtuah a nih thu a tarlang.
Nimina Economic Survey 2019 pharha tarlan tlangpuite chu:-
l Kum 2019-20 chhunga India gross domestic product (GDP) growth rate chu 7% tur anga chhut a ni a, mahse PM thil tum, kum nga chhunga ram economy a leta ṭhantir tur chuan growth rate hi 8% a ngai dawn tih a tarlang.
l Current account deficit (CAD) chu 2017-18 GDP-a 1.9%
aṭangin April - December, 2018-ah 2.6% a pung. CAD pun chhohna chhan hi international crude oil man to-in trade deficit a tihsan chhoh vang a ni. Trade deficit hi 2017-18-a US dollar tld. 162.1 aṭangin 2018-19-ah US dollar tld. 184-ah a pung hman.
l Kum 2018-19 chhungin India chuan ram leh pawl hrang hrangte chu sumdawnna kawnga thawhdunna tur inremna 28 a ziahpui. Heng ramte hnena a thil thawnchhuah hlut zawng chu US dollar tluklehdingawn 121.7 a ni a, a lakluh hlut zawng chu USD tld. 266.9 a ni.
l World Bank Doing Business (DB) Report, 2019-ah India rank chu kum hmasaa 77-na aṭangin 23-naah a kaisang.
l Kum 2018-19 chhungin nitin kawngpui km. 30 zel ang siam a ni. Pradhan Mantri Gram Sadak Yojana (PMGSY) hnuaiah kum 2014 aṭangin rural road km. 1,90,000 zet siam a ni.
l Pradhan Mantri Awas Yojana (PMAY) hnuaiah March 31, 2019 thlengin chenna in vaibelchhe 1.54 sak a ni.
l Kum 2018-19 chhungin India rama telephone connection awm zat chu vaibelchhe 118.34 a tling.
l Kum 2018-19 chhungin ramdang mi khualzin maktaduai 10.6 an awm a, tourism sector sum lakluh chu USD tld. 27.7 a tling.
I Survey hian sorkar laipui flagship scheme ṭhenkhat chu a thil tum tak a tihlan chian theihna turin hming thlak a rawt bawk. Hming thlak a rawtte chu -
a) Beti Bacho Beti Padhao tih chu BADLAV (Beti Aapki Dhan Kashmi Aur Vijay Laskhmi)
b) Swachh Bharat chu Sundar Bharat tia thlak
c) LPG Subsidy chungchang 'Give It Up' tih chu 'Think about the Subsidy' tia sawi leh, tax evasion tih ṭhin pawh 'tax compliance' tia sawi.