Puducherry-a Congress sorkarin fiahna paltlang lo CM Narayanaswamy-a'n banna a thehlut a nghal

Puducherry chief minister V Narayanaswamy  chuan a kaihhruai Congress sorkar chuan thlawptu a ngah tawk tawh loh avangin nimin khan Lieutenant Governor Tamilisai Soundararajan hnenah banna a thehlut. 

Speaker VP Sivakolundhu chuan Chief Minister hian Assembly-ah floor test a paltlang tak loh avangin  rorel inkhawm pawh tihtawp nghal a nih thu a puang. Floor test neih hma hian CM  Narayanaswamy chuan BJP chu two-language system kalpuina, Puducherry-ah Hindi hman luihtirah a puh. BJP chuan India democractic system a tichhe zel nia sawiin, Puducherry-a thil thleng chu politics-a inzawrhna a ni tiin, thu dik tak erawh a la lanchhuah ngei tur thu a sawi. 

CM chuan lieutenant governor hlui Kiran Bedi leh BJP kaihhruai sorkar laipui thawkdun chuan eptu party, NR Congress ṭanrual puiin, a kaihhruai sorkar paihthlak a nih theihna turin an bei tih a sawi. Sorkar laipui chuan Puducherry tana fund an dilte a pek duh avangin mipuite a phatsan a ni, a ti bawk. 

Rorellai Congress MLA pahnih A John Kumar leh Lakshmi Narayanan bakah an thawhpui DMK MLA K Ventakesan-te an ban hnuah, Puducherry Lt Governor Soundararajan chuan Congress chuan sorkarna a chang zui zel thei dawn em tih fiah a, floor test nei turin a ti a ni. 

Seat 30 awmna Puducherry-ah hian member 28 an awm mek a, majority nei turin seat 14 neih phak a ngai a ni. Congress party hian MLA 12 chauh a nei tawh a, hei vang hian MLA 14 neitu, NR Congress kaihhruai ṭangrual pawl chu sorkar thar siam tura koh an nia rin a ni. A nih loh chuan Lt Governor hian President's rule puan a rawt thei bawk.