Tuialhthei man san vangin Rahul Gandhi-a'n Modi sorkar a sawisel

Tuialhthei man san zel avangin Congress hruaitu Rahul Gandhi chuan prime minister Narendra Modi kaihhruai sorkar chu sawiselin mi nawlpui iptea pawisa tihruahsakah leh a ṭhiante iptea pawisa thunsakah a puh.

Hemi chungchang hi a twitter-ah tarlangin Rahul Gandhi chuan,"Petrol pump-a i car-a fuel i thun laiin a metre chak takin a kal tih i hmuh hunah, crude oil rate hi a sang loa a tlahniam zawk tih hria ang che," tiin Hindi-in a ziak.

"Petrol chu litre khat Rs 100 a ni. Modi sorkar hian i iptea pawisa tihruaksak chea a ṭhiante ipteah pawisa thunin hna ropui tak a thawk a ni," tia sawiin #FuelLootByBJP a telh bawk. Congress chuan sorkar laipui chu petrol leh diesel-a chhiah sang tak lain mipui rawkah an puh a, mi nawlpui tana ṭha tur zawkin an chhiah lak chu tihniam turin an phut bawk a ni.

India ramah fuel man hi a sang zel a, tlakhniam lam a pan thei lo. Ni 12 chhung a zawna a man a san chhoh hnuah State-run oil marketing companies (OMC) chuan hma lain Delhi-ah chuan ni hnih chhungin petrol man litre khatah Rs 90.58 a ni ta a, diesel man chu Rs. 80.97 a ni bawk. Metro khawpui zingah chuan Mumbai-ah tuialhthei man hi a to ber a, petrol man litre khatah Rs 97 a nih laiin diesel man chu Rs 88.06 a ni thung.

Madhya Pradesh, Maharashtra leh Rajasthan-ahte chuan petrol man chu nimin khan litre khatah Rs 98.64, Rs 97.30 leh Rs 97.10-te a ni a, kar hmasa lamah khan Rajasthan-ah hian litre khat Rs. 100-te a kai niin report ṭhenkhatah chuan tarlan a ni.