MP Congress MLA-ten bicycle-in Assembly pan

Madhya Pradesh-a eptu party, Congress party MLA-te chuan fuel man sang duh lohna lantirin, nimin khan thirsakawr hmangin session nei turin Assembly House an pan. 

Nimin aṭang khan state assembly budget session neih ṭan a ni. Session nei tura Congress MLA kalte chuan Bhopal khawpuia Vyajpam Square aṭangin Assembly complex thleng hi thirsakawrin an kal a ni. 

Congress hruaitu PC Sharma chuan centre-a Congress party kaihhruai UPA a sorkar lai khan international market-ah crude oil chu a let zetin a sang chho a, mahse hetichung hian India ramah petrol, diesel leh LGP cylinder mante chu tihhniam reng a ni, a ti. "Tunah international market-a crude oil man a tlakhniam hnuah pawh, ram chhungah fuel hi man sang taka hralh chhuah a la ni reng tho a ni," tiin a sawi. 

Fuel man tihsanna chu sut tura an phut thu sawiin, Sharma chuan MP chief minister Shivraj Singh Chouhan pawh fuel man a san zel avang hian bicycle hmang ve tawh mai turin a ti bawk. Chouhan hian UPA sorkar lai khan fuel man sang duh lohna lantirin a hna kal turin bicycle a lo hmang tawh a ni.