Thla 11 hnuah Kashmir Valley-ah rel a service leh ta

Kashmir Valley-ah chuan Covid-19 hripui leng vanga thla 11 chhung lai rel a service theih loh hnuah nimin aṭang khan a service ṭan leh tawh.

Union railway minister Piyush Goyal chuan Kashmir-ah rel a service leh dawn tih hi a twitter-ah tarlang hmasain Banihal-Baramulla section-ah February 22 aṭangin rel a service leh dawn tih hi a tarlang a ni.

India ramah hian nikum March 25 aṭang khan rel service tihtawp a ni a, tunah erawh hri lengin ziaawm lam a pan deuh avangin ramchhung hmun hrang hrangah rel service chhunzawm a ni leh tawh. Railway thupuangtu chuan ramchhungah rel 65% lai chu a service leh tawh tih a sawi a, January-ah ringawt pawh khan rel 250 vel chu an tlan belh leh tawh niin a sawi.