Karnataka-a rorellai MLA 12 in banna thehlut

Karnataka-a Congress-Janata Dal (Secular) ṭang­rual sorkara MLA 12-te chuan kar kal ta Inrinni khan assembly speaker hnenah banna an thehlut. 

Speaker KR Ramesh Kumar hnena banna thehlut, MLA 12 zinga pakua hi Congress member an ni a, JD(S) member pathum an tel bawk. Congress leader leh Karna­taka chief minister hlui Siddara­maiah chuan MLA 12-ten bansan mah se ṭangrual sorkar tan a hlauhthawnawm lo tih a sawi. He thilah hian BJP chu a inrawlh tih a sawi a, mahse engkim a ṭhat vek thu leh, ṭangrual sorkar dinhmun pawh a derthawn dawn loh thu a sawi. 

Congress party chuan," BJP chuan MLA-te chu suma leiin, ṭangrual sorkar paihthlak tumin an che a ni," tiin a sawi. Mahse BJP chuan MLA-te banna chhanah hian inrawlhna a nei lo tih a sawi ve thung. MLA 12-te hian speaker hi an hmuh theih loh vangin an banna lehkha hi a office-ah an dah a, Inrinni tlai vek khan Mumbai an pan nghal a ni.  

Congress-JDS ṭangrual sorkar hian Assembly member 224 awmnaah member 118 an nei mek a ni. MLA 12-te banna thehluh hi pawm a nih chuan majority an hloh thei dawn a ni. He buaina an tawh lai hian chief minister leh JD(S) leader HD Kumaraswamy leh Congress state president Dinesh Gundu Rao chu India ram pawnah an zin ve ve a ni.