BCCI leh ICC-in complaint siam
India leh Sri Lanka-ten Inrinni a Headingley Stadium, Leeds-a International Cricket Council (ICC) World Cup-quarter final an khelh laia stadium chung zawna thlawhtheihna pahnih- Jammu & Kashmir politics lam hawi banner tar rawn thlawk avangin; Board of Control for Cricket in India (BCCI) leh ICC chuan complaint thuhmun an siam.
Thlawhtheihnaah hian 'Justice for Kashmir' tih leh 'India stop genocide & free Kashmir' tih a intar a, hemi chungchangah hian BCCI leh ICC chuan security-te lakah complaint an thehlut a ni. ICC chuan thuchhuah an siamin,"Hetiang thil a thleng nawn leh hian min tilawm lo hle, ICC Men’s Cricket World Cup-a political message chung chang tarlanna awm hi kan ngawih bopui dawn lo. Tournament chhung zawng khan tualchhung police-te nen ṭangho in hetiang thil lo thleng tur hi theihtawp chhuahin kan veng a ni," tiin ICC chuan thuchhuah an siam.
June 29 khan he stadium-ah tho hian Pakistan leh Afghanistan-te an inkhelh ṭumin - 'Justice for Balochistan' tih intarna thlawhtheihna a lo thlawk tawh bawk a; he thil thleng hi ICC chuan tualchhung police-te leh air traffic controller-te hnenah chhuichiang turin an lo ngen tawh bawk a ni.