World Heritage site atan Jaipur thlang

United Nations Educational, Scientific and Cultural Organi­zation (UNESCO) chuan Rajas­than khawpui Jaipur chu India rama World Heritage site 38-na ni turin a thlang.

Archaeological Survey of India-in kum 2015-a World Heritage site-a tel tura UNESCO-ah rawtna a thlen hnuah tentative list-ah dah a ni a; June 20 aṭanga July 10 thleng awh tur- Baku, Azerbaijan-a 43rd Session World Heritage Committee neih mekah Rose Pink City tia hriat lar Jaipur chu UNESCO chuan World Heritage list a tel ve turin a thlangchhuak tih India cultural ministry chuan a tarlang.

Jaipur khawpui hi architecture lama a sanna te, thil kher kuak mawi tak tak te, nunphung leh hnam zia danglam tak tak te avangin a hmingthang hle a, khualzin a hip  hle bawk a ni. Gujarat khawpui lian ber Ahme­dabad leh Jaipur hi India rama World Heritage site khawpui pahnih awm chhun an ni. 

India hian World Heritage site 38 a neihna a ni chiah a, chung zinga 30-chu cultural thil vanga thlan chhuah an ni hlawm. Pasarih erawh chu natural lam avanga thlan chhuah an ni a, mixed site pakhat a awm bawk. World Heritage site hi UNESCO World Heritage Committee-in a thlang ṭhin a - cultural, histo­rical, scientific leh thildang pawi­mawha sulhnu nei ṭhate a thlang chhuak ṭhin. 

He committee-ah hian mem­ber 21  an awm a, chung member-te chu UN General Assembly-in a thlang ṭhin a ni. Prime Minister Narendra Modi chuan Twitter-ah, "Jaipur khawpui hi India hnamzia leh huaisenna pholangtu a ni a, ramdang aṭanga rawn kal mikhualte a lo chhawmdawl thiam em em a ni," tiin a tarlang. Inscription ropui tak tak avanga Jaipur, UNESCO-in World Heritage site atana a thlang chu a lawmawm a tih thu a sawi tel bawk.