Karnataka : SC-in Speaker hmaa inlan turin MLA helte hriattir

12th July, 2019

Karnataka politics buaina chuan ziaawm lam a la pan thei lo a, nimin khan Supreme Court chuan Congress-Janata Dal (Secular) ṭangrual sorkara MLA helte chu Karnataka Assembly Speaker hmaah inlan a, ban an tum thu hrilhchiang turin a ti.

Karnataka-a Congress-JD(S) ṭangrual sorkara MLA 13-te chuan kar hmasa Inrinni khan Speaker office-ah MLA aṭanga an banna lehkha hi thehlutin, Mumbai-an an kal zui nghal a ni. Thawhlehni khan MLA dang pakhatin banna hi a thehlut leh bawk. Mahse Speaker Ramesh Kumar chuan MLA-te lehkha thehluh hi a enfiah hnuah, an zinga pakuate banna thehluh dan chu dan ang taka tih a ni lo tih sawiin, a pawmsak lo a ni.

Hei vang hian MLA helte hian Nilaini khan Supreme Court-ah petition an thehlut a, assembly Speaker Ramesh Kumar chu an banna pawmsak duh lohah an puh. Court chuan vawiinah petition thehluh hi a ngaihtuah chhunzawm ang.

Chief Justice Ranjan kaihhruai bench chuan MLA helte petition thehluh hi nimin khan a ngaihtuah nghal a, Karnataka Assembly speaker chu MLA-te banna thehluh chungchang ngaihtuah turin a ti. Hei bakah hian Karnataka DGP hnenah heng MLA helte hi speaker hmaa inlan tura Mumbai aṭanga Bengaluru an kir hunah pawh venhimna ṭha tak pe turin a hriattir bawk. Nimin tlai khan MLA helte hian Bengaluru lam an pan a ni.

Court-a petition an thehluhah MLA-te chuan speaker chuan ṭangrual sorkar chu hum a duh avangin an banna pawh a pawmsak duh lo tih an sawi a, an banna thehluh pawh Constitution-in a tarlan anga dan ang thlapa ti an nih thu an sawi.

July 6-a Speaker office-a banna thehlutte hi Congress MLA 10 leh JD(S) MLA pathum an ni a, Thawhlehni khan Congress MLA pakhatin a thehluh belh leh bawk a ni. Congress leh JD(S) chuan an party MLA ṭhenkhat hel chungchangah a phenah BJP inrawlhah an puh a, ṭangrual sorkar paihthlak tuma phiarruah an puh. Mahse BJP chuan hemi chungchangah hian inhnamhnawihna a nei lo tih a sawi thung.

MLA helte pawh hian MLA aṭanga banna an thehlut a, an awmna party aṭang erawh chuan an la bang lo tih an sawi.