SC-in Karnataka Speaker thutlukna siam rih lo turin ti

Surpreme Court chuan Karnataka assembly speaker KR Ramesh Kumar chu Congress-Janata Dal (Secular) ṭangrual sorkara MLA helte banna thehluh chungchangah thutlukna siam nghal rih lo tur leh, karleh Thawhlehni thleng nghak turin a ti. 

Ṭangrual sorkar MLA helte hian speaker awm loh laiin a office-ah banna lehkha an thehlut a, mahse speaker chuan an lehkha thehluhte hi a enfiah hnuah an zinga pakuate lehkha thehluh chu a dik lo tih sawiin a pawm thei lo tih a sawi. Hei vang hian MLA helte hian Supreme Court-ah petition an thehlut a, court chuan an petition hi a ngaihtuah sak a ni. 

Speaker chuan court hnen­ah MLA hel zinga 10-te chu Ningani tlai khan a hmu tih a sawi a, mahse MLA-te banna thehluh chungchangah thutlukna a la siam loh thu a sawi. Hei vang hian Ningani tlai khan MLA helte hian banna lehkha an thehlut ṭha leh a, hemi hnu hian Mumbai an pan leh nghal a ni. 

Chief minister HD Kumaras­wamy chuan rorellai MLA eng emaw zatin banna thehlut mah se, Congress-JDS ṭangrual chu a ding nghet reng tih sawiin, majority an la nei tih fiahna turin House-ah floor test neih pawh a inpeih reng thu speaker hnenah a hrilh. JDS hruaitu hian speaker chu sorkar fiahna tura hun ruat turin a ti bawk.