Kum 10 chhungin mirethei mtd. 271-te dinhmun sang zawkah hlang kai

United Nations leh Oxford Poverty & Human Development Initiative-ten kumtin a an tihchhuah ṭhin Multidimensional Poverty Index (MPI) chuan, kum 2006 aṭanga kum 2016 chhung khan India a mirethei makta­duai 271-te chu dinhmun ṭha zawkah hlan kai an ni. 

Heng miretheite hi bungrua, eirawngbawlna mei, hriselna lama invawn thianghlim leh taksa tana chaw hrisel eina lamahte hma an sawn thu an tarlang. MPI tarlan danin khaw­vel ram hrang hrang 101-te zir chian an ni a, chung zinga ram 31 chu low income an ni a, ram 68 chu middle income-ah an awm, ram pahnih erawh high income-ah an awm thung. Heng ram 101 aṭanga mihring tluklehdingawn 1.3-te chu Multidimensional poor an ni a, chumi awmzia chu hriselna kawnga hnufual te, hna thawhchhiat leh hna thawh tur tlemna lamah leh tharum thawh thlen hnemnain a nghawngna ram mekte an ni tihna a ni.

Bangladesh, Cambo­dia, Democratic Repub­lic of Congo, Ethiopia, Haiti, India, Nigeria, Pakistan, Peru leh Vietnam, heng ram 10-a mipui belhkhawm hi tluklehdingawn hnih vel an ni a, tun kum 10 chhung hian retheihna umbo kawngah hma an sawn a, an dinhmun a kang chho. India MPI value hi a pumpuia a tlak hniamna chu 2005-06 khan 0.283 a ni a, 2015-16-ah  0.123 a ni thung. Reithei awm tamna zual Jharkhand MPI value hi 2005-06 khan 74.9% a ni a, 2015-16-ah 46.5% in an tla hniam.