Ayodhya ram inchuh thubuai: SC-in report thehlut turin mediation panel hriattir

Supreme Court chuan Ningani khan Ayodhya ram inchuh thubuai chungchangah mediation panel chu July 18-a report thehlut turin a ti. SC hian he thubuai hi July 25 hian hearing a nei leh dawn a ni.

SC hian nimin khan hemi chungchangah hian hearing neiin, report buatsaih tur mediation panel din tawha mediator-ten report an thehluh hi nghah a ni dawn tih a sawi bawk. Hetihlai hian plaintiff dik tak zinga mi Gopal Singh Visharad chuan hearing hi a hma lama neih a nih theihna turin application a thehlut a, mediation thupekah hian hmasawnna a awm lo tih a sawi. Bench chuan hemi chungchang lo ennawn leh hi a remti a, mahse plaintiff hnenah chuan application pawimawhte thehlut turin a ti thung.

Court hian March 8-ah daih tawh khan Ayodhya buaina chungchang chinfel dan ngaihtuahtu tur,  member pathum awmna mediation panel hi a din tawh a, Supreme Court judge hlui Fakkir Mohamed Ibrahim Kalifulla chuan panel hi a kaihruai a ni. Sri Ravi Shankar leh Madras High Court advocate Sriram Panchu-te chu panel member tur hian ruat an ni ve bawk. May 10 khan SC hian mediation panel hnenah hian August 15 thleng buaina chinfelna tur ngaihtuahna hun hi a pe a ni.